गोरखा, बूढीगण्डकी नदीमा आएको बाढीबाट प्रभावित उत्तरी गोरखाका एक हजार ४४ जनाको हेलिकोप्टरमार्फत उद्धार गरिएको छ । आइतबारदेखि बुधबारसम्म चार दिनमा उद्धार गरिएकामध्ये ७० जना विदेशी नागरिक रहेको सहायक प्रमुख जिल्ला अधिकारी नेत्रप्रसाद शर्माले जानकारी दिए ।
बाढीले उत्तरी गोरका जोड्ने सडक, पदमार्ग र पुलमा क्षति पुर्याएपछि विभिन्न स्थानमा स्थानीय बासिन्दा तथा पर्यटक फसेका थिए । सडक सम्पर्क अवरुद्ध हुँदा उनीहरूलाई सुरक्षित स्थानमा ल्याउन हेलिकोप्टर प्रयोग गर्नुपरेको शर्माले बताए ।
उनका अनुसार आइतबार ९६ जनाको उद्धार गरिएको थियो । सोमबार ३२१, मंगलबार १८६ र बुधबार ४४१ जनाको उद्धार भएको हो ।
बाढीले उत्तरी गोरखाका विभिन्न बस्तीमा क्षति पुर्याउनुका साथै जनजीवन प्रभावित बनाएको छ । चुमनुब्री र धार्चे गाउँपालिकाका विभिन्न क्षेत्रमा घर, झोलुङ्गे पुल, सडक तथा अन्य भौतिक संरचनामा क्षति पुगेको छ । नेपाल रेडक्रस सोसाइटीको प्रारम्भिक आकलनअनुसार जिल्लाका चार स्थानीय तहमा १७४ घरपरिवार प्रभावित भएका छन् ।
उद्धारसँगै राहत सामग्री ढुवानी
सडक र पदमार्ग अवरुद्ध भएपछि प्रभावित बस्तीमा राहत सामग्री पुर्याउनसमेत हेलिकोप्टर प्रयोग भइरहेको छ । हेलिकोप्टरबाट खाद्यान्न, त्रिपाल, म्याट, सिरक, सिरानी, सोलार र जेनेरेटरलगायत सामग्री ढुवानी गरिएको सहायक प्रमुख जिल्ला अधिकारी शर्माले बताए ।
“राहत वितरण गर्नका लागि पनि हेलिकोप्टरकै प्रयोग भइरहेको छ । यताबाट उद्धार गर्न जाने हेलिकोप्टरले राहतका सामग्री लाने र उताबाट आउँदा मान्छेलाई उद्धार गरेर ल्याउने गरेको छ”, शर्माले भने ।
रेडक्रसद्वारा राहत तथा प्रतिकार्य तीव्र
नेपाल रेडक्रस सोसाइटीले पनि बाढी प्रभावित क्षेत्रमा राहत वितरण, क्षतिको आकलन र मानवीय सहायताका कामलाई तीव्रता दिएको छ ।
रेडक्रसका महामन्त्री ऋषि खनालका अनुसार बाढीको सूचना प्राप्त हुनासाथ गोरखा, धादिङ, तनहुँ, चितवन तथा नवलपरासी पूर्व र पश्चिमका स्वयंसेवक परिचालन गरिएको थियो । उनीहरूले जोखिममा रहेका समुदायलाई पूर्वसूचना दिनुका साथै प्रतिकार्यका काममा सहयोग गरिरहेका छन् ।
राष्ट्रिय विपद् जोखिम न्यूनीकरण तथा व्यवस्थापन प्राधिकरण र नेपाली सेनासँगको समन्वयमा प्रभावित क्षेत्रमा त्रिपाल, म्याट्रेस, ब्ल्याङ्केट र डिग्निटी किटलगायत गैरखाद्य सामग्री पठाइएको खनालले बताए । अस्पताल सञ्चालन गर्न सकिने दुईवटा ठूला टेन्टसमेत प्रभावित क्षेत्रमा पुर्याइएको उनले जानकारी दिए ।
“क्षतिको अध्ययन गर्न विज्ञ जनशक्ति प्रभावित क्षेत्रमा परिचालन गरिसकिएको र थप आवश्यक गैरखाद्य सामग्री आज सरकारको समन्वयमा पठाइँदै छ । प्रभावित क्षेत्रमा मानवीय सेवा पुर्याउन स्वयंसेवक तल्लीन छन्”, खनालले भने ।
बाढीबाट क्षतिग्रस्त सडक तथा पुलका कारण प्रभावित बस्तीमा पुग्न कठिनाइ भइरहेको छ । यस्तो अवस्थामा उद्धारसँगै राहत सामग्रीको ढुवानी र प्रभावित परिवारको आवश्यकता पहिचानलाई प्राथमिकता दिइएको छ ।
