काठमाडौं । बंगालको खाडीमा विकसित चक्रवात ‘अर्णव’को प्रभाव नेपालमा देखिन थालेसँगै वर्षा र हिमपातको सम्भावना बढेको छ । मौसम प्रतिकूल हुने पूर्वानुमानपछि उच्च हिमाली क्षेत्रमा पदयात्रा तथा पर्वतारोहणमा निस्कने पर्यटकलाई सतर्क रहन आग्रह गरिएको छ ।
जल तथा मौसम विज्ञान विभागको मौसम पूर्वानुमान महाशाखाका अनुसार बिहीबारदेखि सुरु भएको मौसमी प्रणालीको प्रभाव शुक्रबार र शनिबार थप देखिने सम्भावना छ । यस अवधिमा कोशी, मधेश, बागमती, गण्डकी र लुम्बिनी प्रदेशका धेरै स्थानमा मेघगर्जन, चट्याङ र हावाहुरीसहित मध्यम वर्षा हुन सक्नेछ ।
केही स्थानमा भारी वर्षाको सम्भावना रहेकाले पहाडी क्षेत्रमा पहिरो तथा सडक अवरुद्ध हुने जोखिम पनि छ । उच्च पहाडी तथा हिमाली क्षेत्रमा भारी हिमपात, हिमआँधी र हिमपहिरोको जोखिम रहने महाशाखाले जनाएको छ ।
मौसमको प्रतिकूलताले हिमाली पर्यटन तथा पदयात्रामा असर पार्न सक्ने देखिएको छ । यसअघि पनि हिमपात, बाढी र पहिरोका कारण अन्नपूर्ण चक्रीय पदमार्गमा पर्यटकको आवागमन प्रभावित भएको थियो । पछिल्लो मौसमी प्रणालीले उच्च हिमाली क्षेत्रमा यात्रा गर्ने पर्यटकका लागि थप चुनौती सिर्जना गर्न सक्छ ।
पर्यटन विभागले अक्टोबर २८ देखि नोभेम्बर १ सम्म उच्च हिमाली क्षेत्रमा नजान पर्यटक तथा पर्वतारोहीलाई आग्रह गरेको छ । हिमाली क्षेत्रमा पुगिसकेकाहरूलाई सुरक्षित स्थानमा रहन र मौसमको अवस्था बुझेर मात्र यात्रा गर्न सुझाव दिइएको छ ।
वर्षाको सम्भावनालाई ध्यानमा राख्दै किसानलाई धानबाली भित्र्याउन तथा काटेर सुकाइराखेको धान सुरक्षित राख्न पनि आग्रह गरिएको छ । लगातार वर्षा नभए पनि मौसममा आउने उतारचढावले कृषि, यातायात र पर्यटन क्षेत्रमा असर पार्न सक्ने भएकाले आवश्यक तयारी गर्नुपर्ने देखिन्छ ।
मौसम पूर्वानुमान महाशाखाले मौसमी प्रणालीको नियमित निगरानी गरिरहेको जनाएको छ । विभागले जारी गर्ने पछिल्लो मौसम बुलेटिन र सूचनालाई आधार मानेर यात्रा तथा अन्य गतिविधिको योजना बनाउन आग्रह गरिएको छ ।
