काठमाडौं, कात्तिक १९। ३१औँ विश्व जलवायु सम्मेलन (कोप–३१) मा नेपालको प्रतिनिधित्व परराष्ट्रमन्त्री शिशिर खनालले गर्ने भएका छन्। नोभेम्बर ९ देखि २० सम्म टर्कीको अन्ताल्यामा हुने सम्मेलनमा खनालले नेपाली टोलीको नेतृत्व गर्ने वन तथा वातावरण मन्त्रालयले जनाएको छ।
सम्मेलनमा कृषि, वन तथा वातावरणमन्त्रीले पनि सहनेतृत्व गर्ने कार्यक्रम छ। विगतका कोप सम्मेलनमा नेपालबाट प्रधानमन्त्रीहरू सहभागी हुँदै आएका थिए। यसपटक भने परराष्ट्रमन्त्रीको नेतृत्वमा टोली जाने भएको हो।
सम्मेलनमा नेपालले हिमाली क्षेत्रमा जलवायु परिवर्तनले पारेको असर, जलवायुजन्य विपद्बाट भएको क्षति र त्यसको क्षतिपूर्तिको विषय उठाउने तयारी गरेको छ।
भोटेकोशी क्षेत्रमा आएको बाढीलाई उदाहरण दिँदै नेपालले जलवायु परिवर्तनको असर भोगिरहेका देशलाई अन्तर्राष्ट्रिय सहयोग आवश्यक रहेको विषयमा जोड दिनेछ। हिमनदी पग्लिने क्रम र हिमाली क्षेत्रमा बढ्दो जोखिम पनि नेपालको छलफलको विषय हुनेछ।
खनालले यसअघि फिजीमा भएको प्रि–कोप बैठकमा जलवायु संकटको असर भोगिरहेका देशलाई तत्काल सहयोग गर्न अन्तर्राष्ट्रिय समुदायसँग आग्रह गरेका थिए।
नेपालले जलवायुजन्य हानि–नोक्सानी कोषबाट प्रभावित समुदायले सहज रूपमा सहयोग पाउनुपर्ने र जलवायु अनुकूलनका लागि विकसित देशले पर्याप्त आर्थिक सहयोग उपलब्ध गराउनुपर्ने माग अघि सार्नेछ। जलवायु परिवर्तनमा नेपालको योगदान न्यून भए पनि असर बढी भोग्नुपरेको भन्दै खनालले जलवायु न्यायको विषयलाई सम्मेलनमा उठाउने तयारी गरेका छन्।
