काठमाडौं- प्रतिनिधि सभामा जलवायु परिवर्तनसम्बन्धी बहस चलाउनका लागि समय छुट्याउन माग गरिएको छ।
नेकपा माओवादी केन्द्रका सांसद माधव सापकोटाले अन्तर्राष्ट्रिय सौर्य गठबन्धन (आईएसए) को स्थापनासम्बन्धी सम्झौता फ्रेमवर्कमाथि सामान्य छलफल गरियोस् भन्ने प्रस्तावमा भाग लिँदै जलवायु परिवर्तनसम्बन्धी बहसका लागि समय छुट्याउनुपर्ने माग गरेका हुन्।
उनले भने, 'सदनमा केही समय छुट्ट्याएर जलवायु परिवर्तनका विषयमा बहस गरौं। संसद्मा तीनदेखि चार घण्टा जलवायु परिवर्तनसम्बन्धी बहस गरौं।'
उनले जलवायु परिवर्तनसम्बन्धी छलफललाई बृहत्तर बनाउन लुज फोरम बनाउनुपर्नेसमेत माग गरेका छन्। उनले थपे, 'संसद्मा एउटा जलवायु परिवर्तनसम्बन्धी एउटा लुज फोरम बनाएर जाने दिशातिर पनि ध्यान दिउँ।'
२०३० सम्म सौर्य उर्जामा १००० बिलियन डलर लगानी गरेर एक अर्ब मानिसलाई स्वच्छ उर्जा प्रदान गर्ने लक्ष्य हासिल गर्ने फ्रेमवर्कलाई समर्थन गर्नेसमेत उनले जनाएका छन्।
