काठमाडौं - सगरमाथा आधार शिविरमा मनाइने अन्तरास्ट्रिय नारी दिवसको तयारी तिब्र पारिएको छ । मार्च ८ तारिखका दिन विश्व कै अग्लो स्थानमा हुन लागेको नारी दिवस कार्यक्रमका लागि व्यवस्थापनको काम भइरहेको आयोजक समितिले जनाएको छ ।
जसका लागि विभिन्न क्षेत्रका महिला अधिकारकर्मी तथा अभियान्ताहरु दिङ्बुचे आइपुगेका छन् । उक्त टोलीलाई आज बुधवार खुम्बु पासाङ ल्हामु गाउँपालिका अध्यक्ष मिङ्मा छिरी शेर्पाले दिङबुचेमा खादा लगाइ स्वागत गरेकी हुन् ।
साथसाथै फाउन्डेसनले आयोजना गरेको कार्यक्रमले विश्व समुदायमा सकारात्मक सन्देश प्रवाह हुने गाउँपालिका अध्यक्ष मिङ्मा छिरी शेर्पाले बताइन् ।
सहभागी महिलासहितका टोलीलाई चार हजार चार सय दस मिटरको उचाइमा गरिएको उक्त स्वागत कार्यक्रममा बोल्दै फाउन्डेसनका अध्यक्ष प्रजिता कार्कीले जलवायु परिवर्तनको असरबाट हिमाली महिलाहरू बढी पीडित रहेकाले आधारशिविरमा दिवस मनाउन लागेको बताइन् ।
जसबारे विश्व समुदायको ध्यान खिच विभिन्न क्षेत्रका राष्ट्रिय तथा अन्तरास्ट्रिय ख्याति प्राप्त महिलाहरुलाई आधार शिविरमा उतार्न लागेको उनको भनाइ छ ।
अभियानमा मधेसी आयोगका सदस्य रेणुदेबी शाह, जिल्ला न्यायाधीश अबनी मैनाली भट्टराईसहित २२ जनाको टोली सहभागी रहेका छन् ।
